Повеќе од две децении од донесувањето на Законот за заштита на природата, државните институции не успеаја да го завршат со закон предвидениот процес на повторно прогласување на Националниот парк „Маврово“ – иако за тоа постојат јасни законски обврски. Поради тоа, националниот парк функционира во правен вакуум и без законски задолжителниот план за управување со заштитеното подрачје и без обновен Просторен план.
Стручни тимови ја финализираа неопходната Студија за валоризација финансирана преку јавни и донаторски средства, но органот на управување на ЈУНП „Маврово“ отворено одбива да ги прифати нејзините научни наоди и предлози за зонирање. Наместо да ја извршува својата законска должност за заштита и унапредување на биолошката разновидност, раководството на ЈУНП „Маврово“ со неприфаќање на делови од предложеното зонирање ја оневозможува постапката за повторно прогласување и продолжува со практики кои се спротивни на примарните цели на воспоставување на заштитено подрачје на природата – национален парк. Тоа вклучува користење на шумите и спроведување на комерцијален лов како едни од примарните извори на финансирање на паркот, поддршка на проектите за мали хидроелектрани (МХЕ) во рамките на заштитеното подрачје и други активности кои суштински се спротивни од целта на постоењето на подрачјето.
Ваквото однесување директно ги прекршува Уставот и законите на Република Северна Македонија и упорно ги игнорира Препораките бр. 184 (2015) и бр. 211 (2021) на Постојаниот комитет на Бернската конвенција, ставајќи ја нашата земја под строг меѓународен мониторинг и ризикувајќи меѓународни правни санкции.
Граѓанското општество повеќе нема пасивно да набљудува додека јавните установи чија задача е заштита на нашето природно наследство не ги извршуваат обврските за кои постојат. Затоа, со уште 20 други еколошки организации од државата испративме писмо до Министерство за животна средина и просторно планирање, со кое бараме надлежните институции:
- итно да го преземат процесот за повторно прогласување на Националниот парк „Маврово“;
- Предлог-законот да биде ставен на јавна расправа и да продолжи постапката за негово усвојување во Собранието;
- управувањето со паркот да се усогласи со научните наоди и предложеното зонирање;
- да се прогласи мораториум на активности и проекти што не се во функција на заштитата на природата, додека не се воспостави целосна законска рамка;
- да се исполнат меѓународните обврски на државата, вклучително и препораките во рамките на Бернската конвенција.
Целото писмо, во интегрална форма, можете да го прочитате ТУКА.