Category: Новости

83% од локалното население коешто живее во општините долж Шар Планина сака планината да биде прогласена за национален парк, ова е резултат од спроведеното истражување за утврдување на свесноста на населението во однос на прашањата поврзани со идното прогласување на Шар Планина за национален парк што Македонско еколошко друштво и платформата „Пријатели на Шара“ го спроведоа во 2015 година.

 –    Резултатите од ова истражување се навистина позитивни, конечно знаеме какво е мислењето на локалното население во однос на прогласувањето на Шар Планина за национален парк во руралните и урбаните средини во овој регион. Анализата на податоците покажа дека луѓето сметаат оти со идното заштитено подрачје не само што ќе се воведе поголема контрола врз ресурсите на планината, туку и дека тоа ќе донесе позитивни промени во однос на развојот на регионот, изјави Фросина Пандурска-Драмиќанин, раководител на проект во Македонско еколошко друштво.

Истражувањето е спроведено во над 30 населени места во општините Јегуновце, Теарце, Тетово, Гостивар, Боговиње и Врапчиште на репрезентативен примерок од 410 испитаници на возраст од 18-60 години. Според членовите на платформата „Пријателите на Шара“ ова истражување потврди и еден од поголемите проблеми во однос на ресурсите на планината, а тоа е илегалната сеча.

 –    Во повеќе од прашањата, луѓето одговараа со загриженост во однос на користењето на шумите на Шар Планина. Според истражувањето дури 63% од испитаниците сметаат дека дрвата на Шара се користат прекумерно. A ставот дека генерално природата на планината не е заштитена е изнесен од 79% од испитаниците, изјави Александра Тимосиеска од Институтот за развој на заедницата од Тетово.

 Скоро сите испитаници одговориле дека Шар Планина има потенцијал за развој на туризмот, како фаворити се наведени зимскиот туризам 83%, планинскиот туризам 80% и рекративниот и спортски туризам кој е наведен од 71% од испитаниците. За жал, истражувањето покажа дека само 19% од испитаниците се свесни и запознаени за придобивките на екотуризмот.

Иако ставот на населението е позитивен за Шар Планина да стане национален парк, информираноста за процесот околу нејзиното прогласување е ниска. На прашањето – Дали сте слушнале дека Шар Планина е предложена за заштитено подрачје? негативно одговориле дури 61%.

Целиот извештај од истражувањето можете да го погледнете тука.

Ова истражување е активност на проектот „Зачувување на биолошката разновидност преку одржливо управување на ресурсите на Шар Планина“ спроведуван од Македонско еколошко друштво и финансиран од Германската федерална агенција за животна средина DBU.

Платформата „Пријателите на Шара“ во соработка со Македонско еколошко друштво и Постојаната работна група за регионален рурален развој (SWG) во Југоисточна Европа на 25 март во Општина Драгаш, Косово ја организираше конференцијата „Важноста  од прогласување на Шар Планина за национален парк во Македонија“ во срцето на Националниот Парк „Sharri”. На овој настан учествуваа седумдесет учесници од кои шеесетина беа од Македонија. Целта на оваа конференција беше да сесоздаде дијалог меѓу клучните чинители од регионот на Шара во Македонија и во Косово во однос на заштитата на ресурсите на Шар Планина како и да се презентираат придобивките од постоењето на Националниот Парк „Sharri“, кој што во Косово функционира од 1986 година.

–    Луѓето на почеток од формирањето на паркот мислеа дека се што користат од планината ќе се забрани кога Шара ќе се прогласи за национален парк. Во суштина во националниот парк може да се користат ресурсите, но тоа е регулирано и контролирано од паркот. На пример мештаните ќе бидат задоволени со огревно дрво, ќе можат да ја напасуваат стоката, ќе може да се собираат шумски плодови, но во одредена количина. Со други зборови нема ригорозни забрани туку сè се сведува на умерен и контролиран начин на употреба на ресурсите на Шара, изјави директорот на Националниот Парк „Sharri”, Хазер Дана на конференцијата.

На конференцијата учествуваа претставници од повеќето општини кои гравитираат кон Шар ПланинавоМакедонија и Косово,претставници од релевантните институции поврзани со заштитата на природата во двете земји, ловечки и планинарски друштва од регионот, претставници на невладини организации и локално население. Според учесниците од населените места на Шар Планина конференцијата беше корисна во однос на размена на информации меѓу двете земји.

–    Штета е што немаме кој да се грижи за планината во Македонија, додека чекаме одлука од надлежните, Шара постојано се уништува, не сме против национален парк, но чекаме соодветни одговори од институциите поврзани со функционирањето на идниот парк, изјави еден од учесниците од Македонија на конференцијата.

Платформата „Пријатели на Шара“ и Македонско еколошко друштво се надеваат дека процесот за прогласување на Шар Планина за национален парк ќе се случи наскоро и природата на планината ќе се заштитува соодветно.

Oваа конференција е финансиски поддржанa од АБДА Програмата во рамки на проектот финансиран од Европската Унија – „Потикнување на регионалнатасоработка и рамномерен територијален развој на земјите од Западен Балкан во процесот кон ЕУ интеграција”,имплементиран од Постојаната работна група за регионален рурален развој (SWG) во Југоисточна Европа и проектот „Зачувување на биолошката разновидност преку одржлива употреба на ресурсите на Шар Планина“ спроведуван од Македонско еколошко друштво и финансиран од Германската федерална агенција за животна средина DBU.