Category: Поврзување на луѓето со природата – зајакнување и вмрежување на граѓанските здруженија во Македонија

Неколку уметници од Гевгелија, Струмица, Скопје и Дојран волонтерски учествуваа на отворениот настан во саботата што се одржа во градскиот парк во Стар Дојран. Користејќи го Дојранското Езеро, а особено неговото флористичко богатство како инспирација уметниците на свој начин го афирмираа ова значајно растително подрачје.

На настанот имаше и интерактивно катче каде посетителите можеа да се приклучат за да го покажат својот талент и да научат нешто повеќе за растителниот свет што се среќава во Дојранското Езеро.

„Ренатура“ од Дојран беше организатор на настанот како локален партнер во проектот „Поврзување на луѓето со природата“, но поддршка добивме и од останатите партнери од околината, како „Полимат13“ од Богданци заедно со нивната градоначалничка.

Во рамките на проектот Поврзување на луѓето со природата МЕД го одбележа 18 мај, меѓународен ден за заштита на растенијата или познат како Plants Fascination Day. Неколку земји од светот го одбележуваат овој ден со разни настани преку кои го потенцираат значењето на дивите растенија. Доста од настаните се објавени на специјално отворената веб страна за одбележување на овој ден http://fascinationofplantsday.org

Нашиот начин за одбележување на овој ден се состоеше од посета на три значајни растителни подрачја (ЗРП), каде вршевме мониторинг на растенија. На овој мониторинг за почетници, присутни беа ученици од локални средни и основни училишта, професори и волонтери. Преку посета на неколку локалитети, на учениците им беа претставени основните правила за мониторирање на растенија. Во ЗРП „Богданци“ сите беа воодушевени бидејќи за првпат го видоа едно од најретките растенијаво Македонија – Astragalus physocalyx. Во ЗРП „Илинска Планина“ направивме попис на дивите растенија што ги набљудувавме во влажните ливади покрај Црна Река, додека во ЗРП „Преспанско Езеро“ се запознавме со некои видови растенија што ги има во Паркот на природа „Езерани“.

Планинарскиот клуб „Љуботен“ како еден од локалните партнери во проектот раководен од МЕД „Поврзување на луѓето со природата – зајакнување и вмрежување на граѓанските здруженија во Македонија“ овој викенд на Шара постави две информативни табли.

Таблите содржат информации за географските вредности на Шар Планина, топографска мапа на Шара, нејзиното флористично богатство со опис на неколку видови, како и детали околу атрактивни планинарски тури прикажани картографски. Одбрани беа две локации за овие табли: едната кај најстариот планинарски дом во Македонија – Љуботен каде се опишани 3 планинарски тури, а соодветно на тоа и растенијата кои можат да се сретнат таму; и другата кај планинарскиот дом на ПК „Љуботен“ на Попова Шапка. На оваа табла се опишани турите кои се интересни за посета околу масивот Церипашина како: врвовите Титов Врв, Јелачки Црн Врв, и месноста Лешница.

Таблите беа заеднички поставени од членови на ПК „Љуботен“ и МЕД.

Во рамките на проектот Поврзување на луѓето со природата – зајакнување и вмрежување на граѓанските здруженија во Македонија на 7 мај 2015 година беше отворена првата стрип изложба во Младинскиот културен центар (МКЦ) во Битола.

Стрипот настана како идеја на еко-клубот кој работи во МКЦ Битола и Македонското еколошко друштво. Темата на стрипот беше инспирација од кампот за еколошки мониторинг кој МКЦ и МЕД заеднички го организираа во Националниот парк Пелистер а на кој членовите од еко-клубот ги истражуваа најважните растителни видови.

Пред отворањето на изложбата се одржа и дискусија на еко-клубот поврзана со нивите идни активности.

Членовите на Еко клубот во Младинскиот Културен Центар (МКЦ) Битола имаа шанса да учествуваат на првиот Едукативен еколошки камп одржан на Пелистер во периодот од 12 до 14 септември.  Кампот беше насочен кон запознавање на идните активисти од Битола со биолошката разновидност на Националниот парк Пелистер а особено со значајните растителни видови. За таа цел беа организирани ботанички теренски истражувања на кои учесниците собираа фотографски материјали за анализа.

Дополнително учесниците на кампот беа запознаени со можности и идеи за нивно активно учество во научни истражувачки проекти, самостојно водење на помали проекти и активности кои би придонеле кон промоција на Пелистер како Значајно растително подрачје.  МКЦ и Македонското еколошко друштво и натаму ќе ја поддржуваат работата на еко клубот, кој моментално развива неколку локални еколошки кампањи.

Кампот е дел од проектот  Поврзување на луѓето со природата – вмрежување и зајакнување на граѓанските здруженија во Македонија кој е ко-финансиран од страна на Европската Унија.

За повеќе фотографии од настанот кликнете тука.

Изложбата „Дивите билки од мојот крај“ во организација на Арт Поинт Гумно беше отворена во Слоештица во рамките на проектот „Поврзување на луѓето со природата“. Автори на уметничките дела се учениците од ОУ „Гоце Делчев‟ од Демир Хисар и ОУ „Браќа Миладиновци‟ од с. Жван. Оваа изложба е производ на соработката со Македонското еколошко друштво (МЕД) со чија поддршка беа одржани иницијалните едукативни презентации. Делата на учениците се импресии од дивите растенија од нивниот регион. Покрај ликовните творби учениците доставија и песни и текстови.

Изложбата е поставена во ОУ Браќа Миладиновци во Слоештица, а ја отвори Наталија Меловска, раководител на проектот. Во таа прилика беа доделени и наградите за делата кои се одбрани како победнички од жирито.

Со цел поголема промоција на резултатите добиени при реализацијата на проектот „Поврзување на луѓето со природата“, оваа активност се одвиваше паралелно со манифестацијата СЛАВЕЊЕ НА ПИРЕЈОТ, која традиционално се одржува во чест на делото на еден од најголемите македонски поети Петре М. Андреевски.

Проектот е ко-финансиран од Европската Унија